Eitt av endamálum samkomunnar er bøn. Ein biðjandi samkoma er ein sterk samkoma. Ein biðjandi samkoma er ein signað samkoma. Ein biðjandi samkoma er ein samkoma, sum ber ávøkst.

Bøn er staðið, har tey trúgvandi hava beinleiðis atgongd til Gud, og sum signingin flýtur til teirra ígjøgnum. Har er eingin bíðirøð. Eingin bíðitíð. Har er eingin millumpersónur. Í teirri løtu, vit biðja, hoyrir Gud okkum og er til reiðar at svara bønum okkara.

Rópa til Mín, og Eg skal svara tær, og Eg skal kunngera tær tað, ið stórt og ófatandi er, slíkt sum tú kennir ikki!
Jer. 33:3

Sum samkoma møtast vit til bøn, bæði tá vit eru saman á møtum, men vit kunnu eisini biðja heima við hús, og tá ið vit møtast í smærri bólkum.

Hvørt týskvøld kl. 20 møtast vit at syngja og tilbiðja Gudi saman í Lívdini.

Tú kanst eisini venda tær til samkomuna á tlf. 32 34 00 við einum bønarevni ella fylla eitt bønarkort út her á síðuni.

Í Lívdini ynskja vit at vera ein samkoma fyri teg í øllum lívsins viðurskiftum, bæði høgt á tindinum og djúpt niðri í dalinum, ella tá ið tú stendur við eitt vegamót. Vit vita og hava roynt, at í Jesusi er kærleiki, gleði, vón og friður fyri tann, sum er sorgarbundin, vónleysur, niðurboygdur og friðleysur.

Berið hvør annars byrðar, og uppfyllið soleiðis lóg Kristusar!
Gal. 6:2

Í bønini kunnu vit leggja alt fram fyri Gud og lata Hann bera okkum. Við umsorgan ynskja vit at bera byrðarnar hjá hvørjum øðrum, trygg í, at vit saman hvíla í Guds hondum.

Tí vilja vit eggja tær til at knýta vinabond við onnur í samkomuni, at koma tætt, at tora at vera opin og sárbar/ur, at tora at spyrja nærri og vera har fyri eitt annað menniskja.

Vit hava eitt gott yvirlit yvir tænastur og bólkar í Lívdini sum hava sum endamál at veita bøn, umsorgan og stuðul. Bólkayvirlitið liggur á Church Centre, ein app vit eru farin at brúka. Tú finnur tað við at trýsta á knøttin undir her. Har kanst tú lesa um tey ymisku bólkarnar ella seta teg í samband við bólkaleiðarin. Tú kanst eisini boða frá um tú veit um onkran sum hevur brúk fyri bøn og umsorgan.